- Feil
Festivalutstillinga er opna
Det er fitjardama Bjørg Strømme som er festivalkunstar, og opninga av utstillinga torsdag ettermiddag var startskotet for det offisielle programmet til Fitjarfestivalen.
-
Døtrene til Bjørg Strømme, Solveig og Maren Sofie samtaler med Angunn Bårdsen om bileta.
-
Ternene til Bjørg.
-
Fleire av motiva er henta frå kjende stader på Fitjar, og mange likte desse bileta ekstra godt.
-
Publikum vandrer rundt og ser på bileta medan kultursjef Elise Aarbø tek ein prat med kunstnaren.
Fitjarfestivalen er ein del av markeringa av Fitjar kommune sitt 150-årsjubileum. Festivalen går frå torsdag 19. august til søndag 22. august, og består av svært mange ulike aktivitetar.
Det var ein stolt ordførar som stod for opninga av festivalutstillinga, som finn stad i foajeen i Fitjar kultur- og idrettsbygg. På vegne av kommunen og festivalkomiteen takka ordførar Harald Rydland den lokale kunstnaren Bjørg Strømme for at ho ville setja opp denne utstillinga. "Me er glade for å ha ein kunstnar som Bjørg i Fitjar", sa han i opningstale sin. "Arbeidet hennar får god omtale og er med på å setja Fitjar på kartet på ein positiv måte. Kommunen set og pris på at ho formidlar fine motiv frå Fitjarbygda gjennom kunsten sin."
Utstillinga består av 27 bilete i ulike akvarell-teknikkar. Kunstnaren fortel at ein del av bileta har ho laga med tanke på denne utstillinga, resten har ho hatt liggjande. "Sæterbø gård", som er eit av bileta på utstillilnga, kan ein og finna i Sunnhordlanskallendaren for 2010 saman med eit dikt av Truls Horvei. Bjørg snakkar varmt og engasjert om akvarellteknikkar og spenninga med å jobba med mykje vatten, berre avbroten av folk som vil gratulera med utstillinga eller skryta av eit spesielt bilete. Nokre har fuglebileta som favorittar, andre landskapsbileta og endå andre bileta av eldre bygningar. Når ein male akvarell brukar ein mykje vatten, og tørkeprosessen er viktig for å få eit godt resultat, forklarer Bjørg. Det er denne tørkeprosessen som er så spennande med akvarellteknikken.
Utstillinga er gratis og open for alle, og bileta kjem til å henga i foajeen fram til 4. september. Alle bileta er til sals, og allereie første halvtimen var det minst eit av bileta som fekk den raude "selt"-lappen klistra på seg.
Som ordføraren sa så er utstillinga med på å heva kvaliteten på Fitjarfestivalen. I tillegg er den med å skapa bredde i arrangementa og er vel verd eit besøk.
