Stord klar for kvartfinale etter kamp på Fitjar
Stord-herrane i handball er klar for kvartfinale i Challenge cup etter kampen mot Budvanska Rivijera i Fitjar kultur- og idrettsbygg i ettermiddag.
-
Stord-trenar Mika Nurmi vert intervjua etter kampen. Foto. Kjetil Rydland
-
Jan Didrik Launes takkar den ukrainske dommaren for kampen. Foto: Kjetil Rydland
-
Budvanska i angrep mot Stord. Foto: Helga Rimmereid
-
Stas med e-cup-spel på Fitjar. Foto: Kjetil Rydland
Laurdag møtte Stord-herrane Budvanska Rivijera i Stordhallen og no i dag var det returoppgjer her på Fitjar.
Det var høg handball-stemning i idrettshallen gjennom heile kampen, og aldri før har det vel vore så høgt tempo og så høgt nivå på banen. Med 402 betalande publikumarar var det tett på tribunen, og stemninga vart høgare og høgare etter som Stord-laget fekk det eine målet etter det andre.
Stord vann 24-20 i kampen på Stord, og det såg ut til å gå same vegen på Fitjar og. Stord hadde overtaket gjennom heile kampen og vann til slutt 29-22, og er med det klare for kvartfinale i Challenge cup.
Kampen på Fitjar var historisk på fleire måtar: Dette var den første Challeng cup-kampen her, og dette er første gong Stord har kome så langt som til kvartfinale i same cup. Ikkje rart at publikum på vegen ut utbraut:
Dette var kjekt!
Harald Engevik frå handballgruppa i Fitjar IL held plakaten medan Tom Rydland leiar allsongen "Herlege Stordøy" før kampen vart blåst i gang. Foto: Kjetil Rydland
