Eksklusiv bordtennisgruppe

Kvar fredag mellom klokka 16.30 og 17.30 samles ein gjeng ungar og ungdomar seg til bordtennistrening i gymnastikksalen på Rimbareid skule. 

Dette er ein kjekk måte å avslutte veka på, meiner både ungane og trenarane Marianne Underhaug og Hilde Kristin Gjørven. Dei er ikkje så mange, men før jul var dei oppe i 12-13 stykker på kvar trening og det var helst i meste laget. Dei har kun to bordtennisbord, så blir ein mange vert det fort litt mykje venting. Det er eigentleg mykje bedre i dag når dei er kun 4 jenter på trening. Då får dei spelt mykje, alle saman.

Det er no ikkje berre bordtennis dei held på med. Dei har gjerne litt ballspel, staffettar og anna og. Nokre ungar som ikkje finn seg til rettes med fotball eller handball har funne sin plass her.

Det er dessverre ikkje så mange gutar med. Av ein eller annan grunn forsvann dei fleste av dei til jul, seier leiaren med eit lett sukk.

I dag er det som sagt berre 4 jenter som stiller på trening, to frå 5. klasse og to frå 6. klasse. Det er mykje sjukdom ute og går, og 8. klassingane har berre så vidt kome seg heim frå leirskulen på Voss, så i dag venta me ikkje fleire folk enn dette, fortel leiar Hilde Kristin Gjørven. Men så vert det berre endå betre trening og veileding på dei som er på plass. I ettermiddag held dei på med å ta merker. Som mange andre idrettar har og bordtennisen sine merker, teknikkmerke i bronse, sølv og gull. Her skal ein beherska øvingar i jonglering, presisjon, kontroll, serve, spel, tempo og skru. Før bordtennisspelarane tar helg kan Vilde R. Kjelling stolt smykka seg med både bronse og sølvmerket. Dei andre kom og langt på veg mot merke, men det er fleire øvingar ein skal gjennom, og øvingane krev mykje trening, så dette må dei ha endå meir tid på.

Ungane stormar vidare når dei er ferdige, og Hilde står igjen åleine for å rydda. På spørsmål om ho treng hjelp skryt ho over dei to flotte nye bordtennisborda dei fekk for nokre år sidan. Dei er så lette, kan delast i to og går på jul, så dei kan lett flyttast på av ein person. Så vert dei stua vekk ei vekes tid før dei vert trilla fram neste fredag igjen, viss dei då ikkje bestemmer seg for å ta tidleg vinterferie...

Bordtenninsgruppa er organisert saman med badmingtongruppa, og høyrer til i Fitjar idrettslag.