Fryktar kvalitetsenking i Fitjarskulen

-Når politikarane vil henta inn 1 million kroner i innsparingar, kva skule får me då, spør Ingvild Brekke Myhre i dagens "Sunnhordland".

Myhre er fungerande hovudtillitsvalt i Utdanningsforbundet i Fitjar, og er på vegne av fitjarskulane uroleg for kva konsekvensar det vil få for skulekvardagen med nedskjeringar i ein slik målestokk som er nemnt ovanfor.

-Sist dei skulle spara så mykje, la dei ned Hageberg skule, seier Ingvild B. Myhre, og nemnar vidare at tiltak som kan bli aktuelle er å igjen samla alle 7.klassingane på Rimbareid skule. Det kan føre til at Sælevik skule kan bli todelt og Øvrebygda tredelt. Sjølv om det kan vere positivt for Rimbareid å få to "passeleg store" sjuandeklassar, som Myhre seier det til "Sunnhordland", vil
det bli plassproblem.

-Skulebiblioteket er i dagleg bruk som undervisningsrom fordi brakkene vart stengde i fjor på grunn av muggproblem. Me vart lovt nye klasserom ferdige til jul 2008, men dei er enno ikkje byrja på. Når me så veit at me vil få to fulle åttandeklassar, vil det bli svært trongt på skulen, og skulebiblioteket må brukast til undervisning minst eitt år til, fortel Myhre til "Sunnhordland".

Ho syner òg til at nedskjeringane kan få negative konsekvensar for Kulturskulen, for innkjøp av oppdaterte lærebøker og ser at dette kan  skape uro for både lærarar og elevar. Til slutt oppmodar ho både foreldre og FAU på skulane til å engasjere seg, og til å stille spørsmål. -Kva skule er det eigentleg politikarane vil ha? Dei som seier at eigedomskatten vil føre til at folk flyttar frå, eller ikkje vil flytta til Fitjar, trur dei at folk vil flytta til Fitjar om skulen er i forfall?, spør ho til slutt.